I Love Evil Boys! – Tagalog Visual Novel

Hello po! Hindi muna horror ‘to! Promote ko lang ‘yung bago kong visual novel game for Android. Ang “I Love Evil Boys!”. Ito po ay isang tagalog na visual novel na sana ay mapatawa naman kayo kahit konti!!! 😀

Features:

* Out of this world story
* Completely fictional
* THREE BAD ENDINGS!!!

Download niyo po dito: https://play.google.com/store/apps/details?id=com.iamdreaminggames.iloveevilboys

Private Psychopomp Agency – Available Soon!

Ooooh!  Malapit na palang marelease itong manga na ito from Black Ink!

Private Psychopomp Agency

Eto po ang entry ko sa kanilang Beyond Words Manga Writing Contest. At pinalad naman na nanalo ako. Akala ko mga next year pa ito matatapos pero pwede na natin siyang mabili, malapit na!

Sana po ay suportahan niyo ang manga na ito, at siyempre lahat ng manga ng Black Ink. Sana ay magustuhan ninyo ang simpleng istorya na ibabahagi ko dito.

Maraming, maraming salamat po!

psychopomp

My Story in Librong Itim!

librongitim-lowres.jpg

(Picture from https://librongitim.wordpress.com/)

Good news! Ang isa sa mga short stories na sinubmit ko para sa anthology book na Librong Itim ay pasok! Sa wakas, may maisasalibro ding akda ko, kahit maikling kwento lamang. Hindi ko alam kung kelan mare-release ang next volume (Volume 6 ata?). Sana ay tuluy-tuloy na ito.

Mga two months ago ay nanalo naman ako sa manga story writing contest ng Black Ink. Hindi ko nga alam kung paano ako nanalo. Napahaba kasi yung story ko noong sinusulat ko, eh, meron silang max word count na 2,000 words. Mahigit 3.000 words yung entry ko kaya madami talaga akong tinanggal kaya parang sabi ko malabo na ang manalo. Kaya sobrang nasurprise talaga ako! Fantasy yung genre ng story na ‘yun, hindi horror. Siguro baka next year mapublish na ‘yun as manga!

manga.jpg

Sana din matuloy ‘yung book ng compilation ng mga short stories ko! At sana… sana… sana manalo ako sa 6/58 Lotto!

Mga mahal kong mambabasa, sana po ay tulungan at suportahan ninyo ako. Kahit medyo bumabagal ang pag-post ko ng mga stories (pasensya na po, busy po sa maraming bagay!), patuloy pa rin kayo sa pagbisita at pagbabasa ng mga kuwento dito. Maraming salamat din po sa mga comments na nag-e-encourage sa akin na magpatuloy magsulat. Ilang beses na din ako sumukong magsulat dahil pakiramdam ko ay wala namang nakaka-appreciate pero bumabalik pa rin ako dahil sa mga comments niyo! Kahit yung mga nagrereklamo na bitin daw ang mga kuwento ko o kaya ay hindi nila maintindihan, mas naeencourage po ako na pagbutihin pa ang pagsusulat dahil sa inyo para naman next time, maintindihan niyo na, ahahaha!

Sana po ay suportahan ninyo ang mga stories ko na mapu-publish. At siyempre, suportahan natin ang lahat ng mga akda at librong sinulat ng mga Pinoy!

(Huwag na mag-away ang mga fans ng mga authors!)

 

Na Recover Din!

Whoo! Narecover ko din tong account ko. Na lock out ako mga one month ago hindi ko alam bakit. Basta’t bigla na lang hindi na ako makalogin. Eh, nakalimutan ko na yung email address na associated sa account na ito kaya hindi ako makarequest ng reset password.

Buti na lang at naalala ko yung email ko! Kaya heto, buhay na ulit ang blog na ito. So abangan niyo na lang ang mga stories ko na isha-share dito. Abangan niyo rin po sana ang book ng collection ng mga piling stories ko! In talks po ako with a publisher and sana po ay matuloy!

Sana po ay patuloy niyo akong suportahan at ang aking mga stories!

Love you all, dear readers!

IMG_20161028_095533

Tagal Ko Nang Hindi Nakakapagsulat!

Hay, ang tagal ko nang hindi nakakapagsulat. Sobrang busy meron kasi akong bagong trabaho. Halos wala ng oras para magsulat. Sa mga sumusubaybay, maraming salamat sa inyo. Lagi kong binabasa ang mga comments ninyo. Hayaan niyo, pipilitin kong makapagsulat at makapagpost ng regular.

Marami rin akong comments na nababasa na nagsasabing nabitin sila o walang ending ang mga kwento ko. Maraming salamat po sa comments niyo. Naiintindihan ko po ang inyong nais sabihin. Minsan lang po (actually medyo madalas) kapag nakaisip ako ng istorya, ganoon na talaga sila. Buo na kung baga. Yun na talaga yung ending niya. Sa totoo lang ay mahilig ako sa mga ending na hanging o may twist. Gusto ko rin kasi na pinag-iisip ang readers. Yung mapapatanong sila ng “what if?” Na sila na ang mag-iisip ng sarili nilang ending. Gusto ko kasing i-engange ang mga readers. Yung hindi lang sila passive readers.

Hilig ko kasing magsulat ng tungkol sa mga misteryo at kababalaghan. Siyempre, ang mga misteryo ay kadalasang wala namang eksplenasyon. Kanya-kanya rin tayo ng mga kuru-kuro, haka-haka, paliwanag, at paniniwala. Kapag may napabalitang nagmumulto sa isang lugar, kalimitan ay mayroong backstory, pero wala namang nakakaalam kung totoo talaga ito. Minsan nga ay may iba-iba pang bersyon  na hindi tumutugma. Kapag may nagsabing may white lady na nagpapakita sa isang lugar, magtanong ka sa sampung tao at malamang ay makakakuha ka ng sampung magkakaibang kuwento kung bakit may nagmumulto roon. Ganito rin ang gusto kong palabasin sa mga kuwento ko. Na mayroong mga penomenya na talagang mahirap o imposibleng maipaliwanag.  Na tanging ang ating malikot na imahinasyon na lamang ang makakapunan sa mga patlang at sa mga katanungan. Hanggat maaari ay ayokong magbigay ng eksplenasyon o backstory kung saan nanggaling ang isang multo, halimaw, o anumang kababalaghan dahil sa totoong buhay ay wala naman talagang makakasagot sa mga ganitong katanungan. Tayo ay may kanya-kanyang interpretasyon sa iba’t ibang pangyayari.

Pero alam ko naman na marami (actually parang karamihan sa mga pinoy) ang gusto, lalo na pag-horror, ay detalyado ang lahat. Kapag may nagmumulto ay dapat nakasaad kung sino ang nagmumulto, paano siya namatay, at bakit siya nagmumulto. Okay din naman ang ganitong setup at meron din naman akong mga kuwentong ganito. Pero talagang hindi ko istilo ang ganoon. Gaya ng nabanggit ko, gusto kong pag-isipin ang mga mambabasa. Kaya kung ikaw ang mambabasa na ayaw ng mag-isip pa at gusto na lamang ay ipinapaliwanag sa kanya ang lahat ng mga pangyayari, talagang hindi mo magugustuhan ang mga naisulat ko dito.

Nagpapasalamat pa rin ako sa mga bumibisita at nag-iiwan ng komento dito. Binabasa ko po lahat at nirerespeto ang inyong opinyon. Ang hiling ko lamang po sana ay huwag naman kayong magagalit sa akin. Hindi ko naman kayo pinilit na basahin ang mga kuwento ko. Hindi naman kayo nagbayad. Ipinopost ko po ang mga kwento ko dito para mabasa ninyo ng libre. Hindi ko po kasalanan kung nasayang ang oras niyo dahil binasa niyo ang kuwento ko. Kung hindi niyo nagustuhan ang istorya, maaari niyo namang sabihin sa maayos na paraan. Hindi naman ako magagalit.

Muli, maraming salamat sa mga patuloy na nagbabasa ng aking mga istorya. Sa totoo lang po ay hindi madali ang magsulat. Madalas ay hindi tugma ang nais sabihin ng isip at ang mga salitang naisusulat. Marami akong kuwento na napilitan kong i-abort dahil sa hindi ko talaga malaman kung paano isulat. Sana po ay patuloy lang kayo sa pagsubaybay at pagbabasa.

Marami pa po akong nakakatakot, nakakakilabot, at nakakapagtakang mga kuwento na ibabahagi sa inyo.

Bati – Original Ending

Hi guys! Napakaraming mga nabitin sa seryeng Bati. Naiintindihan ko ang nararamdaman ninyo kaya’t napagdesisyonan kong ipost ang original ending. Pinalitan ko lamang ang ending nito at ginawang hanging para mga readers na ang bahalang mag-isip kung ano ang susunod na mangyayari (ala Inception ba, hehehe). Siguro ay hindi masyadong effective ang naging gusto ko kaya’t marami ang talagang nabitin (at ang iba ay nagsabi pa ng masasakit na salita. Pero okay lang, bilang awtor ay tanggap ko ang lahat ng uri ng kritisismo).

(This is an original work by MartinTristan M. Carneo. For more stories from this author, please visit kuwentonghorror.wordpress.com)

Kung gusto niyo pong basahin ang original ending ng istoryang “Bati”, punta lamang po kayo sa page na ito:

https://kuwentonghorror.wordpress.com/2012/01/25/bati-final/

Feedback naman po kung ano ang mas gusto ninyo. Yung original ending o yung hanging ending? Maraming salamat po.